zindan may muqayyad huwe jis dam harame shah
ambohe qalaeq huwa darwaze pah naagah
balwa hua is darja ke masdood huwi raah
sar sharm se zanjeer pa abid ne rakha aah
   tha wo arqe shaam aseeron ke na tan may
   rota tha har ek azoo ghame shah e zaman may

mashghool jo thay khel may atfaal wo saare
karti thi sakina wahan hasrat se nazaare
kehti thi ke kya hogaye hamjoli hamare
baba alli asghar ko kahan leke sidhaare
   sab bache yahan khelte hai qandah zana hai
   mai khelti thi jin se wo atfaal kahan hai

naagah namudaar hui sham e ghariban
aaya ghazab aalood wahan shumr badh imaan
ek ek se muqaatib huwa wo dushmane yazdan
ab jao ke hota hai muqaffil dar e zindan
   hoegi rehaai na kabhi aale aba ki
   kal dekhiyo phir sair aseerane bala ki

ye sun ke pareshan hua amboh wo saara
ghum hogaya ek shaqs ka farzand qazaara
chillaya pidar us ka raha dil pah na yaara
farzand bhi baba usay keh keh ke pukara
   wo tifl lipatne jo laga aake pidar se
   paida huwi ek aah sakina ke jigar se

bhar bhar ke dam e sard ye ki bano ne guftaar
is bache ko dekho ke kya khush hai ye dildaar
kya naam e pidar pyar se leta ai har baar
ek ham hai ke hai baap ki furqat may giraftaar
   dil may jo mere dard hai khaaliq pa ayan hai
   mai kis ko kahoo baap mera baap kahan hai

baba mere hote to unhe kehti mai baba
ab baap kahan jis ko kahoo baap mai dukhiya
yun koi pidar beti se ghaafil nahi hota
hairaan hoo baba ke wo ashfaq huwe kya
   aada ne hamay qaid kiya shaam may laa kar
   baba mere kyun mujhko nahi dhoondte aa kar

ye keh ke sakina pa jo riqqat hui taari
bas haye pidar keh ke kayi baar pukaari
tadpi jo zameen par to zameen hil gayi saari
jhunjhla ke kaha shumr ne phir karti ho zaari
   ab khoob rula'unga tujhe mai na daroonga
   rah tujhko aseeron se juda qaid karoonga

phir shumr ne baazu e sakina ko jo pakda
kunbe ki taraf us ne ajab yaas se dekha
sab qaidiyon may ek qayamat hui barpa
sajjad ke qadmo par machal kar giri dukhiya
   yun lipti thi bhai se wo is khauf o qatar se
   ek haath to gardan may that ek haath kamar may

mooh dekh ke sajjad ka kehti thi wo darkar
ab aap mere ronay ke zaamin ho biradar
gar tumse chuti zeest meri hoegi kyunkar
ab ro'un to jo chahe kare shumre sitamgar
   bhaiya mujhe to shumr se is waqt bachale
   ab ro'un to kar deejiyo zaalim ke hawale

ab royi so mai royi na phir ro'ungi zinhaar
ab ro'un agar baap ko apne to gunehgaar
farmao ke ab chod de mujhko ye jafa kaar
bazoo mera dukhne laga ay abid e bemaar
   kis tarha juda kunbe se hoegi sakina
   tum kehdo qasam khake na royegi sakina

ye kehti thi kheencha jo sitamgar ne qazara
kurta to phata tha wo phata aur bhi sara
tab abid e bemaar ne rokar ye pukara
ay shumr ye bin baap ki bachi hai khudara
   ghaafil teri dehshat se na hoegi sakina
   ab aisa dari hai ke na royegi sakina
Marsiya - Zindan May Muqayyad Huwe