rawana nehr e laban ko jo sheer khaar huwa
zabaan dikhane pa gardan se teer paar huwa
tadap ke haaton pa hazrat ke hamkanaar huwa
qizaan huwa jo wo gul to galay ka haar huwa
      idhar to shah ko ye sadma e jigar pahuncha
      udhar madine se sughra ka naamabar pahuncha

lahoo may gharq khade thay kamar jhukaye huwe
pisar ki nanhi si mayyat galay lagaye huwe
lahoo bhara huwa daaman usay udaye huwe
kafan ki fikr may qaime ko moo phiraye huwe
      ye haal dekh ke qaasid ki aas toot gayi
      huwa ye raasha ke fouran mehaar choot gayi

utar ke naaqe se aadaab wo baja laaya
magar hussain thay behosh kuch na farmaya
wo nauha padta huwa aur muttasil aaya
nigaah e yaas se moo dekh kar ye chillaaya
      qaraar do mujhe mai be-qaraar hota hoo
      hussain jaan ke tumpar nisaar hota hoo

kaho baqeeya e aulad e murtaza ho tum
ameer e lashkare allah o mustafa ho tum
ghareeb e koofa o mazloom e karbala ho tum
batao qasim e nashaad ke chacha ho tum
      jawaab do pidar e namuraad e akbar ho
      janab e hazrat e abbas ke baraadar ho

bahan hai aap ki zainab sakina dukhtar hai
har aawal aap ke lashkar ka hurr e safdar hai
watan may bhi koi beti aleel o shashdar hai
huzoor ka koi nanha sa laal asghar hai
      zohair aur habeeb aap ke musaaheb hai
      janab aun o mohamed ke mamu saheb hai

hussain bhar ke dam e sard bolay ay ghamkhaar
ameer kaun hai mai to hoo bekas o nachaar
kahan hai akbar o qasim kahan alambardaar
khuda ke bande thay ye sab huwe khuda pa nisaar
      sipaahe zulm ne tanha samajh ke ghayra hai
      hazaron tayghein hai aur ek halq mera hai

hatayi chehre se asghar ke khoon bhari chadar
paseena maut ka maathe se poncha sar ta sar
pukare laashe ki aankhon pa honton ko rakh kar
likhi hai fatema ne deedaa bosi e asghar
      gawah rahiyo ke faaqe se jhoomta hai hussain
      aur unke bhai ki aankhon ko choomta hai hussain

bana loo nanhi si qabr inki ay khujista siyar
to le chaloon pisar e noujawan ke laashe par
to padiyo laasha e akbar pa naama e khaahar
ye keh ke ghoday se utre imam e jinn o bashar
      zameen qabr ki khaatir pasand karne lage
      mazaar khod ke naale baland karne lage

lahoo se ghusl to asghar ko de chuki thi qaza
mali ba-soorat e kaafoor sheh ne khaake shifa
utaara qabr may asghar ka khoon bhara laasha
lita ke khaak pa qible ki simth moo phayra
      phir apne chand ko jab khaak may chipane lage
      to ya ali kaha aur haath thar tharaane lage

ye haal dekh ke qasid ne ki madadgaari
lahad may ungliyon se khaak daali ek baari
pukaari qaime ke dar se ye bano dukhiyari
ye kis ki qabr ki hoti hai ran may tayyari
      hussain bole ke sadme naye guzarte hai
      tumhare hansliyo waale ko dafn karte hai

giri zameen pa kaleja pakad ke wo nachaar
pukari meri kamayi hai ay zameen hoshiyaar
na murda jaaniyo hai meri jaan ye dildaar
zameen mai tere sadqe tere makeen ke nisaar
      ye zair e khwab meri mannaton ka baagh mila
      mujhe ye phool mila aur dil ko daagh mila

balayein door se lele ke phir kiya ye bayaan
tumhari nanhi lahad ke mai waari asghar jaan
andhera ghar hai na ghabraiyo ye maa qurbaan
akele sone ki mushkil khuda kare aasaan
      tumhare chaahne wale galay lagayenge
      mujhe yaqeen hai janaab e ameer aayenge
Marsiya - Rawana Nehre Laban Ko

Reciter: Jaffar Ali
Download mp3
Listen Online