ran se jab khake sina akbar e zeeshan aaye
maa ki qidmat may koi aan ke mehmaan aaye
ghar may laashe ko liye shaah e shaheedan aaye
nauhagar khaak basar chaak gareban aaye
      di sada qatl huwe yousuf e saani bano
      mil gayi khaak may akbar ki jawani bano

dekhle aakhri deedaar pisar marta hai
saamne aankhon ke ye noor e nazar marta hai
ab koi dam may mera rashke qamar marta hai
moo se baahar hai zaban tashna jigar marta hai
      dam hai seene may ruka zakhmon se khoon jaari
hai
      sheher bano tera ghar lutne ki tayyari hai

pahunchi qaime may jo hazrat ki ye pur dard sada
muztarib hogaye naamoose rasoole do sara
kaha chilla ke sakina ne ke hae hae bhaiya
fizza daudi suye dar phaynk ke sar par se rida
      peet'ti zainab e muztar nikal aayi baahar
      bano ghabra ke khule sar nikal aayi baahar

sheh ke kaandhe pa jo dekha ali akbar ko nidhaal
haath phaila ke ye chillayi ke hae hae mere laal
kya ghazab hogaya ay baadshahe nayk qisaal
raas aaya na mere bache ko atharwan saal
      tukde tayghon se badan hogaya saara hae hae
      kaun tha jis ne mere sher ko maara hae hae

roke bano se ye farmane lagay sarwar e deen
sar na peeto abhi zinda hai mera maahe-jabeen
saans aati hai pa har dam hai dam e baaz paseen
kooch inka bhi hai aur ham bhi hai marne ke qareen
      sab chute ab na raha koi hamara bano
      is jawaan bete ke gham ne hamay maara bano

sun ke maadar ki sada khol diye deeda e nam
haath utha kar kaha rowo na mere sar ki qasam
paas aakar hamay chaati se laga lo is dam
ran se aaye hai tumhari hi mulaaqat ko ham
      phir ye ghar shaah ke iqbal se dekha ham ne
      par tumhe aake ajab haal se dekha ham ne

baal kyun bikhre hai kyun phaynk di sar par se rida
neel kyun seene pa hai kyun hai gareban phata
khaak kyun moo pa mali ho ye pisar tum pa fida
shaah dunya may salamat rahe ye kya ye kya
      lut gayi ye na sukhan moo se nikalo amma
      mai to jeeta hoo kaleje ko sambhalo amma

zaqmi hone ki mere kis ne khabar pahunchayi
jhoot hai maine to hargiz nahi barchi khaayi
aap tak bete ko taqdeer salamat laayi
dekh ke hazrat ke qadam tan may meri jaan aayi
      marg se pehle ho maatam ye zaboon hai amma
      mere kapdon pa to abbas ka khoon hai amma

boli bano ke jo kehte ho khuda yun hi kare
ay mere laai ye maa teri bala leke mare
lao dho daalun mai jo khoon may kapde hai bhare
chand se haath hai phir kis liye chaati pa dhare
      mujh ko maloom huwa khalq se jaate ho tum
      mere rone ke liye zakhm chupate ho tum

bano sadme se na mar jaye ye darr hai beta
sab tere dil ki mere dil ko khabar hai beta
haaye seena ye tera khoon may tar hai beta
phir ye kya hai jo nahi zaqme jigar hai beta
      sansanata hai jigar jaan chali jaati hai
      is lahoo se to mere doodh ki boo aati hai

aarzu hai ke phale phoole mera naqle muraad
tum dulhan byaah ke laao mera ghar ho aabaad
dekhloon aankhon se apni mai tumhari aulaad
phir mai dunya se jo guzroon to rahe rooh bhi shaad
      daadi kehlaaungi rutba mera bartar hoga
      tera farzand bhi hamshakl e payambar hoga

aah ki sun ke ye akbar ne basad ranj o malaal
dard chaathi may utha ghair huwa aur bhi haal
dil may ye soch ke rone laga wo nayk qisaal
ham safar karte hai amma ko hai shaadi ka khayaal
      barr may hovega kafan khaak pa chehra hoga
      na dulhan hogi na aulaad na sehra hoga
Marsiya - Ran Se Jab Khake Sina

Reciter: Alamdar Razvi
Download mp3
Listen Online