qaid se chutt ke aayi hai zainab
sadme dil par uthaai hai zainab
qabr sheh ki banayi hai zainab
kuch yathimon ko laayi hai zainab
      kehti hai roke lo khabar bhai
      khatm ab hogaya safar bhai

mai hoo zainab falak sataayi hoo
tumse milne yahan mai aayi hoo
aur lutay khaafile ko laayi hoo
bhai kya kya sitam uthaai hoo
      shaam tak nange sar gayi zainab
      kyun na pehle hi mar gayi zainab

utt ke dekho to ek nazar bhai
tukde sadmon se hai jigar bhai
hogaya hai sufayd sar bhai
jhuk gayi hai meri kamar bhai
      waada poora mai kar ke aayi hoo
      pusht par taaziyane khaayi hoo

saare kunbe ko saath laayi thi
mehnaton se ye ghar basayi thi
maine daulat ye maa se paayi thi
ho gayi dafn jo kamayi thi
      ab ho kyun kar meri basar bhai
      haaye kis moo se jaaun ghar bhai

ab na ut ke yahan se jaaungi
qabr baalon se apne jhaadungi
phool har subha mai chadhaungi
shamma raaton ko mai jalaungi
      yun hi hojaegi basar bhai
      kya kare jeeke nauha gar bhai

gar koi pooche kis ki jaayi hai
qabr kis ki ye tu banaayi hai
mujhko qismat kahoongi laayi hai
mai bahan hoon ye mera bhai hai
      thay nabi ke ye maan'ne waale
      aur musalman thay maarne waale

kya bataun shaheed ki haalat
tan tha zaqmi thi dhoop ki shiddat
aur namazi pa pyaas ki shiddat
sar uthaane ki bhi na di mohlat
      dafn is jaa hai naamoor bhai
      de diya raah e haq may sar bhai

thi muqaddar may mere ruswaayi
kyun na darbaar hi may mout aayi
paysh e haakim gayi ye dukh paayi
ghussa aaya tha pee gayi bhai
      jo huwe zulm seh gayi zainab
      sab ke rone ko reh gayi zainab

kya bayaan ho jo guzre ranj o mehan
baazuon may mere bandhi thi rasan
thay tamashaayi saare mard o zan
lut gayi mai shaah e zaman
      phiri baazar e shaam may zainab
      gayi darbar e aam may zainab

mujhse bar gashta thi meri taqdeer
khoob ki meri izzat o tauqeer
sar se chadar chini hui tasheer
phiri baazar ay mai hoke aseer
      aur bhi kuch sunaaun kya bhai
      apne baazu dikaaun kya bhai
Marsiya - Qaid Se Chutt Ke Aayi

Reciter: Jaffar Ali
Download mp3
Listen Online