pidar ki maut hai marna jawan bete ka
safar jahan se karna jawan bete ka
ghazab hai khoon may bharna jawan bete ka
sitam hai jee se guzarna jawan bete ke
      shabaab tha ke shah-e-mashraqain se choote
      mohibbo peeto ke akbar hussain se choote

khuda pidar ko na dikhlaye marg-e-rahat-e-jaan
kalayja zakhmi ho jab dil ko phir kharaar kahan
udhar to seena-e-akber se guzri nok-e-sina
lahoo idhar huwa chashme imaam-e-deen se rawan
      tadap ke jaanib-e-gardoon nigaah ki sheh ne
      zameen hil gayi ek aisi aah ki sheh ne

pukaarte huwe daude mere shaheed pisar
mere jawan mere maeroo mere saeed pisar
mere haseen mere yousuf mere rasheed pisar
qareeb ho kahin maidan se ba'eed pisar
      pidar pa aaj nayi waredaat hai beta
      khabar nahi mujhe din hai ke raat hai beta

kidhar gaye mere gul payrahan ali akbar
mere khaleekh mere kam sukhan ali akbar
jawana marg ghareeb-ul-watan ali akbar
ujaad kar gaye mera chaman ali akbar
      bula ke ghar se yahan ashqiyan ne loot liya
      duhaai hai ke mujhe karbala ne loot liya

pukaari dewdi se bano pisar mila ke nahi
batao marham-e-zakhm-e-jigar mila ke nahi
sitam ke abr may mera qamar mila ke nahi
ali ke laal wo aali gowhar mila ke nahi
      shataab lao mere mannataon ke paale ko
      tumhi se loongi mai apne muraadon ke paale ko

sada ye sunte hi sultan-e-behrobar daude
ye dard-e-dil tha ke thaame huwe jigar daude
kabhi to fauj pa manind-e-sher-e-nar daude
kabhi udhar gaye rote kabhi idhar daude
      luti hui wo kamayi basad talaash mili
      zameen pa khoon may ghaltaan pisar ki laash mili

ajeeb haalat-e-farzand-e-naujawan dekhi
atash se honton pa nikli hui zabaan dekhi
qamar se chehre pa zardi labon pa jaan dekhi
kaleja phat gaya seene may jab sina dekhi
      pidar ke saamne bete ka dam ukhadta tha
      hussain dekhte thay aur ghar ujadta tha

khareeb laash-e-pisar baith ke ye farmaye
zameen-e-garm se beta utho ke ham aaye
sada ye sunte hi akbar ne haath phailaaye
lipat ke laash se shah lab pa ye suqan aaye
      gale lagaalo ke mohamad ka mai nawasa hoon
      zaban dikha ke kaha ya hussain pyasa hoon
Marsiya - Pidar Ki Maut Hai
Download mp3
Listen Online