mehshar ki subah aaj numayan hai shaam may
kunba shafi e hashr ka hai izdihaam may
sar nange roohe fatema hai ehtemaam may
khasaan e zuljalaal hai balwa e aam may
      jibreel ki khuzadiyan tashreef laayi hai
      mushkil kusha ki betiyan bandi may aayi hai

hai beech may khule huwe aale abaa ke sar
naizon pe unke gird hai fauj e khuda ke sar
bachon ke sar buzurgon ke sar aqroba ke sar
rotay hai warison le saron ko dikha ke sar
      sar rakh ke zaanu'on pa jo waaris ko rote hai
      zaalim saron may naizo ki nokay chubote hai

naize pa hurmala ke chamakta hai ek hilal
bikhre huwe hai chand se moo par jhandulay baal
aulaad wale kehte hai ay rabb-e-zuljalaal
is be-zaban ke khoon ka kisne liya wabaal
      gardish may haye haye ye kiska sitara hai
      lekar balayein kehti thi banu hamara hai

nagaah huwa yazeed ka darwaza aashkaar
haazir naqeebo haajibo darbaano chobbdaar
tayghe alam kiye huwe jallad o naabakaar
mujrayi be-hisaab tamashayi be-shumaar
      aiwaan may bhi raqs ka saaman tamam tha
      par intezar e itrat e khairul anaam tha

bolay sab ek baar wo aaye gunahgaar
aaye khusoor waar wo aaye gunahgaar
jallado hoshiyar wo aaye gunahgaar
wo aaye be-dayaar wo aaye gunahgaar
      jabse ke aasman khuda ne banaye hai
      aal e rasool aaj hi bandhi may aaye hai

roka umar ne badke alam ko sipah ko
mujrah par aa jamaa ke kiya bargah ko
aur haske dekha aal e risalat panaah ko
awaaz di nabeera e sher e ilaah ko
      haa haa mihaar rokna oonton ka thaamna
      ab hai yazeed ke dar e daulat ka saamna

pahunche muraad ko safar apna tamam hai
uthro aseero uthro adab ka muqaam hai
aagay to aastana e sultaan e shaam hai
dekho to kya jalaal hai kya ehteshaam hai
      iski vila may arsh ko humne hila diya
      ghar panjetan ka khaak may bilkul mila diya

sun na ye tha ke sab ke jigar par churi chali
oonton se uthri bibiyan keh keh ke ya ali
aankhein phira ke rehgayi bano ki laadli
roohe hussain ko huwi jannat may be-kali
      taaqat badan ki ghat gayi aur zouf bad gaya
      uthre jo be-sahare to dum sab ka chad gaya

seene may dam abhi na samaye thay hai ghazab
jo aaye reesma liye haathon may be-adab
ghabrake poocha bewon ne tajveez kya hai ab
bola umar ke majlis e haakim may hai talab
      manzoor hai ke roohe ali phir malool ho
      majme may rooh bikhraye aal e rasool ho

mazloomiyat se roke ye mazloomon ne kaha
haakim ki ye khushi hai to phir uzr humko kya
bazaar may to phir chuke be-maqna o rida
aasan karega mushkil e darbar bhi khuda
      haazir hai le chalo hamay gumrahon le chalo
      sar par nahi hussain jahan chaho le chalo
Marsiya - Mehshar Ki Subah Aaj

Reciter: Alamdar Razvi
Download mp3
Listen Online