kisi beemar ne khat apne maseeha ko likha
haal beemariyo ka beti ne baba ko likha
jo jo armaan tha dil may shahe wala ko likha
aur salam apna phupi saani-e-zehra ko likha
      dil may khush thi ke mera khat jo pahunch jayega
      hai yaqeen ab koi lene ke liye aayega

khath may alqaab ye bekas ne kiya tha marqoom
chaahne waale pidar mere imam-e-mazloom
raat din roti padi rahti hoo ab to maghmoom
aap to bhool gaye khair ye mera maqsoom
      na gila tumse hai na koi shikayat baba
      haa mubarak ho sakina se mohabat baba

khair turn ko na sahi mujh ko hai turn se ulfat
kisi soorat mujhe dikhlao turn apni soorat
jaanti hoo ke sakina pa bahot hai shafqat
acha ay baba bahan ki mai karoongi qidmat
      mujh ko bulwa ke wahan mera bhi dilshaad karo
      lo kaneezi may sakina ki mujhe yaad karo

gar nahin mujhko bulate ho to aao baba
shaukh se apni sakina ko bhi laao baba
usko seene pa sulaate ho sulaao baba
hum ko rulwate ho to khair rulaao baba
      ranj sehti hui dunya se guzar jaaungi
      aap aaye nahi ek roz mai mar jaaungi

arzoo hai ke kisi taur yahan aajaye
aap ki jaan se door aah jo hum marjayen
apne haathon se kafan aap mujhe pehnaye
aur takleef lahad tak bhi zara farmaye
      bas zyada na sawari yahan tehraiye ga
      dafn karte hi mujhe aap chale jaiye ga

maa ko marqoom tha ay madare farqunda siyar
sakht baba ki tarha kar liya turnne bhi jigar
aas bachne ki nahi leejiye ab jald khabar
warna beemar ka ab hota hai dunya se safar
      nahi umeed ke bach jaye ye muztar amma
      doodh ab baksh do beemar ko aakar amma

tha raqam hazrat-e-zainab ko phupi nekh qisaal
tum ko bhaiya ali akbar se mohabbat hai kamal
hai har dum mujhe rah rah ke ab aata hai khayal
ke mere bhai pa hai bhari at-tharwan saal
      haan tasadduq ke liye dayr na farmaiyega
      sadqa hone ke liye bhai pa bulwaiyega

tha alamdar ko tehreer ke abbas chacha
door ufttada bhatiji se huwe turn bhi khafa
sunte hai aap ki har baat ko mere baba
mujh ko bulwaiye ya laaiye unko mai fida
      choomungi unke qadam tumko duayein doongi
      unki bhi aur tumhari bhi balayein loongi

likha akbar ko ke ay baap ke pyare akbar
aur phupi jaan ke bhi raaj dulaare akbar
mere baba ki zaeefi ke sahaare akbar
hai ye beemar bahan gor kanare akbar
      waada le jane ka tha dekhiye kab aate hai
      aap to aate nahi qalq se hum jaate hai

tha khitaab asghare nadan se ke ay rashke qamar
ghutniyon bhi na chale hogaya dar pesh safar
mujhe har dum tera rehta hai qayaal aath pehar
sothaye ho ya jhoole may ya jaagte ho ay asghar
      neend aaram se aur chain se aati hogi
      jab sakina tere jhoole ko jhulaati hogi

yaad aate hai tumhare wo jhandoole mujhe baal
sadhosi saal salamat raho ay mere laal
tumko beemar behan ka nahi maloom ehwaal
maut nazdeek hai aur zoaf-o-naqahath hai kamal
      mai jo mar jaun kahin bhool na jaana asghar
      ghutniyon chalte hue qabr pa aana asghar

ye na tha ilm usay kat gaya sarwar ka gala
qasim-o akbar-o abbas huye shah pa fida
teer khaakar ali asghar bhi gaye suye baqa
baakhi ek bhai tha sajjad so wo qaid hua
      maa phupi behne luti qaime bhi taraaj huwe
      ek chadar ko haram shah ke mohtaaj huwe
Marsiya - Kisi Bemaar Ne Khat

Reciter: Alamdar Razvi
Download mp3
Listen Online