jab sadr e zeen se gir pade abbas e bawafa
jangal se aayi girya e zehra ki bhi sada
akbar ne daud kar shah e wala se ye kaha
chaliye huzoor nehr pa maare gaye chacha
      be dast dushmano ne kiya us dilayr ko
      ro aaiye taraai may hyder ke sher ko

ye sun ke peet'te huwe uthe zameen se shaah
farmaya hae ghazab mere bache huwe tabaah
ye kya kaha ke aankhon may din hogaya siyaah
mazloom se bichad gaye abbas aah aah
      muddat huwi tamam sakina ke chain ki
      toda falak ne aaj kamar ko hussain ki

ye kehke suye nehr chale shah e karbala
maanind e baid kaampte thay sheh ke dast o pah
ammama tha na farq pa ne dosh par rida
tasveer waar thay hamatan sibte mustafa
      maqtal ki khaak se tan e anwar ata huwa
      seena khula huwa tha gareban phata huwa

pahunche junhi taraai may baadeeda e pur aab
dekha tapaan hae khaak farzand e bu-turab
shaano pa ki nazar to jigar ko rahi na taab
bas haye bhai kahke gira wo falak janaab
      bekaar dast o pa thay shah e khush-khisaal ke
      le aaye laash tak ali akbar sambhaal ke

moo rakh ke khoon bhare huwe chehre pa di sada
bhaiya hussain aaya hai aawaz do zara
hae haath dono haath badan se huwe juda
baazu ke sadqe in tere shaanon ke mai fidaa
      bhaiya hamare haath to bekaar hogaye
      tum haath khoke jaafar e tayyar hogaye

moo rakh ke moo pa kahne lage shaah e khush-khisaal
abbas mai kin aankhon se dekhoo tera ye haal
is dam bhi hae tumhe mere aadaab ka khayal
jab zibha honge hum to kise hoega malaal
      sadqe hussain tere tan e paash paash ke
      ek baar humko gird to phirne do laash ke

sunkar sada e hazrate shabbir e naamdar
khola lahoo bhari huwi aankhon ko ek baar
sar rakh ke paaye sheh pa ye bola wo zee wiqar
tashreef aap laaye zahe izz o ifteqaar
      jee chahta hai ye ke nisar e huzoor hoo
      kis tarha ut ke gird phiroon choor choor hoo

baithe hai aap aur mai leta hoo aah aah
kya door hai huzoor agar baksh de gunaah
sar shaq hai zarb e gurz se ya shaah e deen panaah
karwat bhi ab to le nahi sakta hai khair khah
      dukhte hai bolne may jarahat phate huwe
      dekhe huzoor mere hai baazu kate huwe

ye sun ke us dilayr ne ek sard aah ki
mashkeeze pe tadap ke ba-hasrat nigaah ki
moo sharm se chupa liya godhi may shaah ki
haalat tabah ho gayi hyder ke maah ki
      jab dil ko bekali ho to kis tarha kal pade
      zaanu pa shah ke aankhon se aansu nikal pade

farmaya sheh ne kis liye rote ho zaar zaar
lo ab kuch apna haal kaho tum pa mai nisar
kya jee pa hai bani jo tadapte ho baar baar
ki arz us jari ne ke hai waqt e iqtesaar
      aaqa se chootne ka khalaq hai ghulam ko
      paaunga ab kahan shah e gardoon maqaam ko

ye kehte thay ke phir gayi aankhon ki putliyan
hichki ke saath aagayi sookhe labon pa jaan
hasrat se dekh kar taraf e shaah e  ins o jaan
dunya se kooch kar gaye abbas e naujawaan
      choda jari ne saath shah e mashraqain ka
      ek ghul utha ke mar gaya aashiq hussain ka

chillathi hai ye zouja e abbas e naamwar
chodo mujhe khuda ke liye peetne do sar
waaris mera guzar gaya loota ajal ne ghar
hae hae yateem hogaye dono mere pisar
      pardes may ali ke pisar se bichad gayi
      ab khaak udaane do ke meri maang ujad gayi
Marsiya - Jab Sadre Zeen Se

Reciter: Alamdar Razvi
Download mp3
Listen Online