jab khatema ba qair huwa fauj e shaam ka
kausar pa khaafila gaya pyasi sipaah ka
ghar lut gaya janab e risalat panaah ka
khaak udh rahi thi haye ye tha baargaah ka
      bhai thay na rafeeq na wo noor e ain thay
      do behne rone wali thi aur ek hussain thay

farmate thay ke waah ye ta'qeer hai ajal
akbar ke baad kaunsa tha zeest ka mahal
ab mujhko ek baras ke barabar hai ek pal
maut aaye ab ye hai shajar e zindagi ka phal
      ek ja churi gala pa jo chalthi to khoob tha
      ye jaan unke saath nikalti to khoob tha

hum sab ke baad khalq se jaane ko reh gaye
sar peetne ko ashq bahane ko reh gaye
us naujawan ka daagh uthane ko reh gaye
peedi may aah thokare khaane ko reh gaye
      beta kahan khabar jo dam e inteqaal le
      itna nahi koi ke giroo to sambhaal le

naagaah suye laash e pisar jaa padi nazar
chillaye dil ko thaam ke sultan e behrobar
sotay ho kya dhare huwe ruqsaar khaak par
akbar utho ke ghode se girta hai ab pidar
      bhoole pidar ko neend may qurban aap ke
      aao namaz e asr pado saath baap ke

abbas e naamdaar taraai se utke aao
phut'ta hai qalb jal rahe hai sab jigar ke ghao
chidko meri zira pa jo pani kahin se pao
chalte huwe adam ke musafir se milte jao
      ghaflat ki tum ko neend hai shabbir kya kare
      meri tarha kisi ko na bekas khuda kare

chillaya fauj ko pisar e saad e naabakaar
lo ghayr lo hussain ko sab milke ek baar
palte pade sawaaron ke le kar risaaladaar
do ghaul baandhe aaye kamadaar das hazaar
      teer afghanon may tayghon may bhaalon may ghir gaye
      bekas hussain barchiyon walon may ghir gaye

syed ke martabe ko na jaana hazaar haif
teeron se sadr e paak ko chaana hazaar haif
shaane thay naawakon ka nishana hazaar haif
mazloom ka wo barchiyan khana hazaar haif
      toote thay sab rasool ke pyare hussain par
      kya waqt pad gaya tha tumhare hussain par

girte hai aap aur sambhaale koi nahi
seene se kaun teer nikaale koi nahi
sab mar chuke hai chaahne waale koi nahi
be-jaan pade hai godh ke paale koi nahi
      bekas hai aap zour sipaah e adoo ka hai
      moo jis ka dekhte hai wo pyas ka lahoo ka hai

fizza ne jaake qaime may bewon ko di khabar
hae hae mere quzaade ka kat'ta hai tan se sar
bistar se ut'ke gir pade sajjad e nauhagar
qaime se nikli bibiyan bachon ko chor kar
      hilta tha arsh hazrath e zainab ke bain se
      gir gir ke daudti thi milne hussain se

chillati thi aray mera bhai hai kis taraf
looti huwi ali ki kamayi hai kis taraf
darya kidhar hai khoon ka taraayi hai kis taraf
sone ki ja hussain ne paayi hai kis taraf
      rasta de ay zameen ke falak ki satayi hoo
      mai apne pyare bhai se milne ko aayi hoo

mai syeda hoo rehm karo laash ko batao
ay ahle qarya binte ali ki madad ko aao
dunya may tum khushi raho uqba may chain pao
syed kidhar hai khoon may ghaltan batate jao
      ya lut gaye falak ne ye dukh hum pa daale hai
      ay bhaaiyon madine ke hum rehne wale hai

shah ke karaahne ki jo aane lagi sada
daudi udhar nabi ki nawasi ba-rehna pa
dekha behan ne kat'te huwe bhai ka gala
aankhon pa haath rakh ke giri binte murtuza
      gham se kaleja phat gaya zehra ki jaayi ka
      uthi to dekha naize pe sar apne bhai ka
Marsiya - Jab Khatema Ba Qair Huwa

Reciter: Alamdar Razvi
Download mp3
Listen Online