azan do ay mere dilbar savera hone wala hai
tumhare baad aalam may andhera hone wala hai

kaha sarwar ne akbar se ujala hone wala hai
bala ke ban may ek khooni tamasha hone wala hai
hamare khoon se rangeen sehra hone wala hai
kaleje se tumhare paar naiza hone wala hai
azan do....

rasool allah ki itrat par aafat aane wali hai
ali ke naunehalon par musibat aane wali hai
nabi ki aal par subhe qayamat aane wali hai
aseerane haram ki shaam ghurbat aane wali hai
azan do....

shaheede zulm hojayenge bhai bhi bhatije bhi
tahe tayghe sitam hojayenge bache bhi boodhe bhi
chidegi gardane asghar jawan ke kaleje bhi
chalenge teer bhi talwar bhi khanjar bhi naize bhi
azan do....

juda shane kisi ke aur kisi ke sar qalam hongay
na abbase jari honge na tum hongay na hum hongay
hamare qaanwade par bahot zulmo sitam hongay
jafaon par jafa hogi bala hongay alam hongay
azan do....

labe darya mere haaton pa naazon ka pala hoga
zaban sookhe labon par hogi aur manka dhala hoga
sitam insaniyat par is se badkar aur kya hoga
mere baysheer ke gardan may teere hurmala hoga
azan do....

sitamgaron ka nargha hoga aur aale abaa hogi
rasan basta hamare baad binte murtaza hogi
bhare darbaar may zehra ki beti berida hogi
meri nanhi sakina par tamachon ki jafa hogi
azan do....

shabe ashoor sheh ke qaimo may mirza tha ek mehshar
basad hasrat pisar se apne farmate thay jab sarwar
mere kadiyal jawan ay hoo baroo hamshakale paighambar
tumhare baad ay noore nazar hai khaak aalam par
azan do...
Noha - Azan Do Ay Mere Dilbar
Shayar: Mirza Murtaza Ali
Nauhaqan: Mir Raza Ali (Maulana)
Download Mp3
Listen Online