akbar teri laash uthaye kaise hussain

dil thaame huwe aur kham hai kamar
beenayi nahi aur zakhmi jigar
akbar teri laash....

ay beta zaeefi hai aisi raasha hai badan may baba ke
abbas nahi qasim bhi nahi imdad ki khaatir kaun aaye
liye boj isi gham ka dil par
akbar teri laash....

sadmo ki thakan ne maar diya din bhar to uthaye hai laashe
sab sakt ke bandhan tooth gaye beenayi gayi tere gham se
tanha hai sare maqtal ye padar
akbar teri laash....

ay laal teri soorat ki qasam ab taab nahi hai is dil ko
mai boodha padar aur tum ho jawan kya waqt pada itna socho
mai bekas o tanha aur muztar
akbar teri laash....

khaime may tujhe roti hai phupi aur zeb e musalla hai madar
athara baras paala hai tujhe tu khud hi bata ay mere pisar
kya beet rahi hogi dil par
akbar teri laash....

pardes may mere noore nazar jeete ji mujhe tu maar gaya
naize ki tarha ye gham akbar hum sab ke dilon se paar gaya
roti hai teri maa ye kehkar
akbar teri laash....

karta hoo duwayein khaaliq se qismat na kisi ko de ye gham
ho saamne bete ka laasha aur baap kare uska maatam
sunle ye dua rabbe akbar
akbar teri laash....

taqdeer kisi maadar ko bhi ye gham na dobara dikhlaye
beta ho shabihe payghambar maa jeeti rahe wo mar jaye
mar jayegi ro ro kar madar
akbar teri laash....

jo tere kaleje may thi sina hai zakhmi usi se dil mera
kis tarha sina wo khaynchi thi mai tujhko nahi batla sakta
dil tukde huwe jaata hai pisar
akbar teri laash....

jo bain kiye sheh ne ban may mazhar wo bayan kar sakta nahi
seene pe pisar ke sar rakhkar ye kehte rahe bas shahe deen
ab zinda rahoo mai bhi kyun kar
akbar teri laash....
Noha - Akbar Teri Laash
Shayar: Mazhar Abdi
Nohaqan: Shadman Raza
Download Mp3
Listen Online